Auld Lang Syne (by Robert Burns)

Auld Lang Syne
by Robert Burns

Should auld acquaintance be forgot,
      and never brought to min’?
Should auld acquaintance be forgot,
      and auld lang syne ?

CHORUS

For auld lang syne, my dear,

    for auld lang syne,

we’ll tak a cup o’ kindness yet,

    for auld lang syne.

We twa hae run about the braes,
      and pou’d the gowans fine,
But we’ve wander’d mony a weary foot,
      sin’ auld lang syne.

CHORUS

We twa hae paidl’d in the burn,
      frae morning sun till dine;
But seas between us braid hae roar’d
      sin’ auld lang syne.

CHORUS

And there’s a hand my trusty fiere!
      and gies a hand o’ thine!
And we’ll tak a right gude-willie waught,
      for auld lang syne.

CHORUS

And surely ye’ll be your pint-stowp!
      and surely I’ll be mine!
And we’ll tak a cup o’ kindness yet,
      for auld lang syne.

CHORUS

A Red, Red Rose (by Robert Burns)

A Red, Red Rose
by Robert Burns

O my Luve’s like a red, red rose
    That’s newly sprung in June:
O my Luve’s like the melodie
    That’s sweetly played in tune.

As fair art thou, my bonnie lass,
    So deep in luve am I;
And I will luve thee still, my dear,
    Till a’ the seas gang dry.

Till a’ the seas gang dry, my dear,
    And the rocks melt wi’ the sun:
I will luve thee still, my dear,
    While the sands o’ life shall run.

And fare thee weel, my only Luve
    And fare thee weel, a while!
And I will come again, my Luve,
    Though it were ten thousand mile.